ភ្នំពេញៈ រដ្ឋបាលរាជធានីភ្នំពេញបានសម្រេចកំណត់ដាក់ផ្នែកខ្លះនៃខណ្ឌចំនួន ២ ជាតំបន់លឿងទុំ គឺខណ្ឌឫស្សីកែវ និងខណ្ឌពោធិ៍សែនជ័យ បន្ទាប់តំបន់នេះមានករណីឆ្លងវីរុសកូវីដ ១៩ កើនឡើងជាថ្មី ខណៈតំបន់លឿងទុំដែលត្រូវបានកំណត់កាលពីថ្ងៃទី ១៩ ខែឧសភា កន្លងមក ត្រូវបានបិទបញ្ចប់ និងដាក់មកជាតំបន់លឿងវិញ។
លោក ឃួង ស្រេង អភិបាលរាជធានីភ្នំពេញនៅយប់ថ្ងៃទី ២៦ ខែឧសភា បានចេញសេចក្តីសម្រេចចំនួន ២ ផ្សេងគ្នា ទាក់ទងនឹងការដាក់ចេញនូវវិធានការកំណត់ពណ៌នៃតំបន់ខ្លះក្នុងភូមិសាស្ត្ររាជធានីភ្នំពេញ ដើម្បីទប់ស្កាត់ការឆ្លងរាលដាលនៃជំងឺកូវីដ ១៩។
លោកបានលើកឡើងថា៖ «រដ្ឋបាលរាជធានីភ្នំពេញបានកំណត់ផ្នែកខ្លះនៃភូមិផ្សារតូចនៃសង្កាត់ទួលសង្កែទី១ ខណ្ឌឫស្សីកែវ និងផ្នែកខ្លះនៃភូមិព្រៃទា ១ នៃសង្កាត់ចោមចៅទី៣ ខណ្ឌពោធិ៍សែនជ័យ ដែលមានអត្រាការឆ្លងកើនឡើងថ្មី ជាតំបន់លឿងទុំសម្រាប់រយៈពេល ១៤ ថ្ងៃ គិតចាប់ពីម៉ោងសូន្យ នាថ្ងៃទី ២៧ ខែឧសភា រហូតដល់ថ្ងៃទី ៩ ខែមិថុនា ដើម្បីទប់ស្កាត់ការឆ្លងរាលដាលនៃជំងឺកូវីដ ១៩»។
លោក ឃួង ស្រេង បានបញ្ជាក់ថា បុគ្គលគ្រប់រូបត្រូវបានហាមឃាត់មិនឱ្យធ្វើដំណើរចេញពីលំនៅឋាន ឬទីសំណាក់បច្ចុប្បន្នរបស់ខ្លួនទេ។ ប៉ុន្តែការធ្វើដំណើរចេញក្រៅអាចត្រូវបានអនុញ្ញាតក្នុងករណីចាំបាច់ដូចជា ការធ្វើដំណើរទៅប្រកបមុខរបរ ឬអាជីវកម្ម ឬបំពេញការងារក្នុងវិស័យឯកជនដោយត្រូវមានលិខិតអនុញ្ញាតធ្វើដំណើរពីរដ្ឋបាលរាជធានីភ្នំពេញ និងលិខិតបញ្ជាក់ពីការងារ។
លោកបានបន្តថា អ្នករស់នៅក្នុងភូមិសាស្ត្រដែលកំណត់ជាតំបន់លឿងទុំនេះ អាចធ្វើដំណើរទៅកាន់ទីកន្លែងលក់ម្ហូបអាហារ ឱសថស្ថាន និងទីកន្លែងលក់សម្ភារប្រើប្រាស់ចាំបាច់ប្រចាំថ្ងៃបានតែ ២ នាក់ប៉ុណ្ណោះ ក្នុង ១ លំនៅឋាន ដោយមិនឱ្យលើសពី ៣ ដង ក្នុង ១ សប្តាហ៍ នៅក្នុងទីតាំងដែលជិតបំផុតក្នុងរង្វង់ភូមិសាស្ត្រដែលខ្លួនរស់នៅ។
សេចក្តីសម្រេចបានបញ្ជាក់បន្ថែមថា រាល់សកម្មភាពការងារមុខរបរ ឬអាជីវកម្មដែលដំណើរការតាមរយៈប្រព័ន្ធអនឡាញដោយត្រូវកាត់បន្ថយចំនួនអ្នកធ្វើការឱ្យមកនៅត្រឹមកម្រិតអប្បបរមាមិនឱ្យលើសពី ២ ភាគរយ និងត្រូវអនុវត្តគោលការណ៍ អាហារថ្ងៃត្រង់នៅនឹងកន្លែងបំពេញការងារ។
នៅក្នុងតំបន់លឿងទុំនេះដែរ អាជ្ញាធរត្រូវហាមឃាត់រាល់ការជួបជុំ ឬការប្រមូលផ្តុំមនុស្សលើកលែងតែការជួបជុំក្នុងចំណោមសមាជិកគ្រួសារដែលរស់នៅក្នុងលំនៅឋាន ឬទីសំណាក់ជាមួយគ្នា ការរៀបចំពិធីបុណ្យសពដោយគោរពតាមការកំណត់របស់អាជ្ញាធរមានសមត្ថកិច្ច ការយកវត្ថុសំណាកមកវិភាគរកមេរោគកូវីដ ១៩ និងការចាក់វ៉ាក់សាំងការពារជំងឺកូវីដ ១៩ និងការជួបជុំរបស់បុគ្គលិកសុខាភិបាលដែលបំពេញការងារសង្គ្រោះបន្ទាន់ផ្សេងទៀតប៉ុណ្ណោះ។
ជាមួយគ្នានេះដែរ លោក ឃួង ស្រេង បានលើកឡើងថា៖ «រាល់ការជួបជុំ ឬការប្រមូលផ្តុំមនុស្សដើម្បីសេពគ្រឿងស្រវឹងគ្រប់ប្រភេទត្រូវបានហាមឃាត់ ហើយត្រូវបានអនុវត្តបម្រាមគោចរនៅតំបន់លឿងទុំនេះដោយផ្អាកជាបណ្តោះអាសន្ននូវរាល់ការធ្វើចរាចរណ៍ និងរាល់សកម្មភាពការងារមុខរបរ ឬអាជីវកម្ម នៅចន្លោះម៉ោង ៨ យប់ ដល់ម៉ោង ៣ ព្រឹក លើកលែងតែក្នុងករណីចាំបាច់ដែលត្រូវបានអនុញ្ញាតប៉ុណ្ណោះ»។
ទន្ទឹមនឹងនេះដែរ លោក ឃួងស្រេង ក៏បានចេញសេចក្តីសម្រេចបិទបញ្ចប់ការកំណត់ភូមិសាស្ត្រតំបន់លឿងទុំដែលត្រូវបានរដ្ឋបាលរាជធានីភ្នំពេញដាក់ចេញវិធានការរដ្ឋបាលបន្តកាលពីថ្ងៃទី ១៩ ខែឧសភាកន្លងមកឱ្យមកជាតំបន់លឿងវិញ បន្ទាប់ពីបានអនុវត្តវិធានការនានា និងពិនិត្យលើស្ថានភាពជាក់ស្តែង។
យោងតាមសេចក្តីសម្រេចចេញកាលពីយប់ថ្ងៃទី ២៦ ខែឧសភា បានលើកឡើងថា៖ «វិធានការរដ្ឋបាលចំពោះការកំណត់ភូមិសាស្ត្រជាតំបន់លឿងនេះត្រូវអនុវត្តសម្រាប់រយៈពេល ៧ ថ្ងៃ គឺចាប់ពីថ្ងៃទី ២៧ ខែឧសភា រហូតដល់ថ្ងៃទី ២ ខែមិថុនា»។
គួរបញ្ជាក់ថា ភូមិសាស្ត្ររាជធានីភ្នំពេញដែលត្រូវបានប្តូរមកជា តំបន់លឿងវិញនេះមានផ្នែកខ្លះនៃភូមិដើមចន្ទន៍ (ទីតាំងនៅខាងក្រោយយឿត្រី) នៃសង្កាត់ច្បារអំពៅទី២ ខណ្ឌច្បារអំពៅ, ភូមិ ២៣ នៃសង្កាត់បឹងកក់ទី២ ខណ្ឌទួលគោក, ភូមិត្រពាំងថ្លឹង ១ ភូមិត្រពាំងថ្លឹង ២ ភូមិត្រពាំងថ្លឹង ៤ និងភូមិទួលពង្រនៃសង្កាត់ចោមចៅទី១ ខណ្ឌពោធិ៍សែនជ័យ, ផ្នែកខ្លះនៃភូមិចុងខ្សាច់ និងផ្នែកខ្លះនៃភូមិបាក់ទូកនៃសង្កាត់ទួលសង្កែទី១ ខណ្ឌឫស្សីកែវ, ផ្នែកខ្លះនៃភូមិ៥ នៃសង្កាត់ស្ទឹងមានជ័យទី២ និងផ្នែកខ្លះនៃភូមិដំណាក់ធំ ២ ផ្នែកខ្លះនៃភូមិដំណាក់ធំ ៣ និងផ្នែកខ្លះនៃភូមិទ្រា ៤ នៃសង្កាត់ស្ទឹងមានជ័យទី ៣ ខណ្ឌមានជ័យ៕
No comments:
Post a Comment